વલસાડનાં પારડીમાં યુવકે ગળે ફાંસો ખાઈ આત્મહત્યા કરી લીધી હતી. પારડી પોલીસ મથકે રોઝીબેન શૈલેષભાઈ ઠાકોરએ નોંધાવેલી ફરિયાદ મુજબ, ગત તારીખ ૨૧ એપ્રિલના રોજ સાંજે સાતેક વાગ્યે તેઓ પોતાના દીકરા એમીલભાઈને જમવાનું આપીને પોતાના ઘરે પરત ગયા હતા. બીજા દિવસે તારીખ ૨૨ એપ્રિલના રોજ સવારે જ્યારે તેઓ એમીલભાઈ માટે ટિફિન લઈને ગયા હતા.

ત્યારે ઘરનું બારણું ખોલતાં જોયું કે એમીલભાઈએ ઘરના આગળના રૂમમાં સીલિંગ ફેન સાથે જર્સી બાંધી ગળે ફાંસો ખાઈ લીધો હતો. જે બાદ રોઝીબેને તરત જ પોતાના ભાઈ અન્ડ્રેશન રવિકાન્તદિખ્રસ્તીને જાણ કરી હતી. તેથી તેઓ સ્થળ પર આવ્યા હતા અને એમીલભાઈને નીચે ઉતારીને ખાનગી વાહન મારફતે પારડી સરકારી હોસ્પિટલ લઈ ગયા હતા. જ્યાં ફરજ પરના તબીબે એમીલભાઈને મૃત જાહેર કર્યા હતા. ઘટના અંગે પોલીસે અકસ્માત મોત અંગેનો ગુનો નોંધ્યો હતો. રોઝીબેને એવો પણ ઉલ્લેખ કર્યો છે કે, તેમને કોઈ પર શક કે વહેમ નથી. એમીલભાઈના લગ્ન ચાર વર્ષ પહેલા થયા હતા અને તેઓ પોતાની માતાથી અલગ ભેસલાપાડા પરિયા રોડ સ્થિત ઘરમાં રહેતા હતા. પોલીસે આ મામલે વધુ તપાસ હાથ ધરી હતી.