નવસારીનાં મરોલી વિસ્તારમાં રહેતી એક વિદ્યાર્થિનીને વર્ક ફ્રોમ હોમની લાલચ આપી ઠગબાજોએ રૂ.૯૯ હજાર ઓનલાઈન ટ્રાન્સફર કરાવી છેતરપિંડી કર્યાની ફરિયાદ મરોલી પોલીસ સ્ટેશનમાં નોંધાઈ હતી. મળતી માહિતી મુજબ, જલાલપોર તાલુકાનાં મરોલી નજીકનાં એક ગામમાં રહેતી વિદ્યાર્થિનીને ગત ડિસેમ્બર મહિનામાં ઈન્સ્ટાગ્રામ ઉપર મેસેજ આવ્યો હતો. જેમાં તેને DIGITAL TRENEUROOFICIALની આઇડી મોકલવામાં આવી હતી.

જેમાં ઠગબાજોએ વર્ક ફોમ હોમથી વધુ રૂપિયા કમાવા મળશે તેવી લાલચ આપી આ સ્કીમમાં વધુ ગ્રાહકો ભેગા કરવા જણાવ્યું હતું. ઘર બેઠા રૂપિયા કમાવવાની લાલચમાં આવી ગયેલ વિદ્યાર્થિની તેમની વાતોમાં ભોળવાઈ ગઈ હતી. ત્યારબાદ ચીટર ટોળકીએ સ્કેનર મોકલી ટુકડે ટુકડે રૂપિયાની માંગણી કરતા વિદ્યાર્થિનીએ સ્કોલરશિપથી બેંક એકાઉન્ટમાં જમા કરેલા રૂ.૯૯ હજાર ઓનલાઇન ટ્રાન્સફર કરી દીધા હતાં. જોકે ત્યારબાદ વિદ્યાર્થિનીને તેની સાથે સાયબર ફોડ થયું હોવાનો અહેસાસ થતા પોલીસમાં રાવ કરી હતી. આ અંગે મરોલી પોલીસે અજાણ્યા ઈસમો સામે સાયબર ફ્રોડનો ગુનો દાખલ કરી કાયદેસરની કાર્યવાહી હાથ ધરી હતી.