નવસારીનાં ચીખલી તાલુકાનાં સાદકપોર ગામનાં બામણિયા ફળિયામાં એક સપ્તાહમાં એક દીપડો અને એક દીપડી પાંજરે પુરાયાની હતી ત્યાં જ તલાવચોરા ગામના વચલા ફળિયામાં વહેલી સવારે એક ઘરની પાછળ દીપડો વાછરડાને ખેંચી જઈ ફાડી ખાઈને ત્યાંથી પલાયન થઈ ગયો હતો.

જયારે વચલા ફળિયામાં રહેણાક વિસ્તારમાં દીપડો આવી ચઢતા સ્થાનિકોમાં ગભરાટનો માહોલ સર્જાયો હતો. જોકે ગત માસમાં તલાવચોરા બારોલીયા-સંજય ફાર્મ ખાતે નિલમભાઈ પટેલના ખેતરમાંથી દીપડો પાંજરે પુરાયો હતો અને હવે તલાવચોરા વચલા ફળિયામાં પણ રહેણાક વિસ્તારમાં દીપડાનો પગરવ થતા સ્થાનિકોની ચિંતા વધી હતી. જોકે આ અંગેની જાણ ચીખલી વનવિભાગને કરવામાં આવતા આર.એફ.ઓ. દ્વારા જરૂરી સર્વે કરાવી પાંજરું ગોઠવવાની તજવીજ હાથ ધરવામાં આવી હતી.