ગોધરા તાલુકાનાં હારેડા ગામ પાસે રોંગ સાઈડમાં આવતી ઈકો કારના ચાલકે એસટી બસ સાથે અથડાવી અકસ્માત સજર્યો હતો. જોકે ઈકો કારમાં સવાર મુસાફરોને નાનીમોટી પહોંચી હતી. મળતી માહિતી મુજબ, શહેરા ગામે આવેલ વચ્છેસર કોલોની ખાતે રહેતા ઈનુસભાઈ ગુલામભાઈ ઘાંચીએ કાંકણપુર પોલીસ મથકે ફરિયાદ નોંધાવી હતી. જેમાં તેઓએ જણાવ્યું હતું કે, તેઓ ગોધરા એસટી ડેપોમાં ચાલક તરીકે ફરજ બજાવે છે.

ગત તારીખ ૩૦ એપ્રિલના રોજ તેઓ ઝાબુઆથી ભુજ રૂટની બસ લઈને ગોધરાથી ભુજ જવા માટે નીકળ્યા હતા. ઈનુસભાઈ ગુલામભાઈ ઘાંચી બસ લઈને ગોધરા અમદાવાદ હાઈવે પર હારેડા ગામ પાસેથી પસાર થઈ રહ્યા હતા. ત્યારે સર્વિસ રોડ પર સામેથી રોંગ સાઈડમાં આવેલા ઈકો કારના ચાલકે એસટી બસ સાથે સામેથી કારને અથડાવી હતી. આ અકસ્માતમાં ઈકો કારમાં સવાર ૬ જેટલા મુસાફરો તેમજ ચાલકને નાનીમોટી ઈજાઓ પહોંચી હતી. અકસ્માત બાદ એમ્બ્યુલન્સ દ્વારા તમામ મુસાફરોને સારવાર અર્થે ખસેડવામાં આવ્યા હતા. જ્યારે બસના મુસાફરોને અન્ય બસ મારફતે રવાના કરવામાં આવ્યા હતા. બનાવ અંગે અકસ્માતને લઈને ઈકો કારના ચાલક સામે કાંકણપુર પોલીસ મથકે ફરિયાદ નોંધવામાં આવી હતી.